ឯកអគ្គរដ្ឋទូត៖ កម្ពុជានិងឥណ្ឌា សុទ្ធតែមានគោលដៅទេសចរណ៍ដ៏គួរឲ្យទាក់ទាញ

(ភ្នំពេញ)៖ លោក Vanlalvawna Bawiltung ឯកអគ្គរដ្ឋទូតឥណ្ឌាប្រចាំកម្ពុជា បានលើកឡើងថា ប្រទេសកម្ពុជា និងប្រទេសឥណ្ឌា សុទ្ធតែមានគោលដៅទេសចរណ៍ដ៏គួរឲ្យទាក់ទាញ ដែលអាចឲ្យប្រជាជនទាំងពីរ ធ្វើដំណើរទេសចរណ៍ទៅវិញទៅមក។

លោកបានលើកឡើងបែបនេះ ក្នុងឱកាសស្ថានទូតឥណ្ឌានៅកម្ពុជា បានរៀបចំកម្មវិធីការធ្វើដំណើរទាក់ទងពាណិជ្ជកម្មរវាងកម្ពុជា-ឥណ្ឌា ឆ្នាំ២០២៦ នៅថ្ងៃទី២០ ខែកុម្ភៈ ឆ្នាំ២០២៦ នៅសណ្ឋាគារ Shangri- La Phnom Penh ដោយមានការគាំទ្រពីសមាគមទេសចរណ៍កម្ពុជា និងផ្នែកការទូតសេដ្ឋកិច្ច ក្រសួងការបរទេសឥណ្ឌា។

មូលហេតុដែលលោកឯកអគ្គរដ្ឋទូតលើកឡើងបែបនេះ ក៏ព្រោះថា នៅកម្ពុជាមានប្រាសាទបុរាណ និងរូបបដិមាជាច្រើន ដែលត្រូវបានសាងសង់ឡើង ដោយសារទទួលឥទ្ធិពលសាសនាហិណ្ឌូ ខណៈឥណ្ឌាជាប្រទេសដែលមានប្រជាជនកាន់សាសនានេះច្រើនបំផុត។ ជាពិសេស ប្រជាជនឥណ្ឌា ចង់ទស្សនាប្រាសាទអង្គរវត្ត ដែលត្រូវបានកសាងឡើងដំបូងបែបសាសនាហិណ្ឌូ និងក្រោយមកបែបពុទ្ធសាសនា។ ចំណែកឯប្រជាជនកម្ពុជាវិញ ចង់ទៅលេងពុទ្ធគយា និងប្រាសាទមហាដើមពោធិដ៏ពិសិដ្ឋ ដែនដីដែលព្រះពុទ្ធត្រាស់ដឹង ព្រមទាំងប្រាសាទសារណាត (Sarnath temple) ដែលជាកន្លែងសម្គាល់ដែលព្រះពុទ្ធសម្តែងធម្មទេសនាលើកដំបូង បន្ទាប់ពីបានត្រាស់ដឹង។

បន្ថែមលើនេះ ជើងហោះហើររវាងកម្ពុជានិងឥណ្ឌា ក៏ចាប់ផ្តើមកើនឡើង ក៏ជាហេតុផលដែលប្រជាជនប្រទេសទាំងពីរងាយធ្វើដំណើរ។ ជាក់ស្តែងថ្មីៗនេះ មានជើងហោះហើរត្រង់ (Direct Flight) ពីអាកាសយានដ្ឋានអន្ដរជាតិតេជោភ្នំពេញ ទៅកាន់ដែនដីពុទ្ធគយា ព្រមទាំងពីខេត្តសៀមរាប ទៅទីក្រុងកុលកាតា ផងដែរ។

សូមជម្រាបថា នៅក្នុងកម្មវិធីនេះ មានបទបង្ហាញពីកន្លែងទេសចរណ៍សំខាន់ៗដូចជា ប្រាសាទអង្គរវត្ត នៅប្រទេសកម្ពុជា។ ជាមួយគ្នានេះ ក៏មានបង្ហាញពីពុទ្ធគយា (Bodhgaya) ដែនដីនៃការត្រាស់ដឹងរបស់ព្រះពុទ្ធ ដែលជាកន្លែងសក្ការៈបូជាព្រះពុទ្ធសាសនាដ៏ពិសិដ្ឋបំផុតនៅលើពិភពលោកកន្លែងដែលព្រះពុទ្ធបានត្រាស់ដឹងនៅក្រោមដើមពោធិ។ វាមានប្រាសាទមហាដើមពោធិ (Mahabodhi) ដែលចុះក្នុងបញ្ជីបេតិកភណ្ឌពិភពលោករបស់អង្គការយូណេស្កូ។ បន្ថែមលើនេះ ក៏មានបង្ហាញពីប្រាសារណាត ដែលជាកន្លែងសក្ការៈបូជាដ៏ពិសិដ្ឋបំផុតមួយក្នុងចំណោមទីសក្ការៈបូជាព្រះពុទ្ធសាសនាទាំងបួន ដែលជាកន្លែងសម្គាល់ដែលព្រះពុទ្ធសម្តែងធម្មទេសនាលើកដំបូង បន្ទាប់ពីបានត្រាស់ដឹង។ ទីតាំងនេះ មានស្តូបបុរាណ Dhamek (សាងសង់ដោយព្រះបាទ អសោក), Mulagandhakuti Vihara និងប្រាសាទផ្សេងៗទៀត។

បើតាមរបាយការណ៍របស់ក្រសួងទេសចរណ៍កម្ពុជា នៅឆ្នាំ២០២៥ មានភ្ញៀវទេសចរបរទេសមកលេងកម្ពុជា មានប្រមាណ ៥ ៥៧០ ០០០នាក់ ក្នុងនោះមានទេសចរឥណ្ឌាមកទស្សនាប្រទេសកម្ពុជាចំនួន ៧១ ០៤៦នាក់ ខណៈចំនួនទេសចរកម្ពុជាទៅលេងនៅប្រទេសឥណ្ឌា នៅឆ្នាំ២០២៥ មិនទាន់ទិន្នន័យនោះទេ។ ចំណែករបាយការណ៍របស់ក្រសួងទេសចរណ៍ឥណ្ឌា មានប្រជាជនកកម្ពុជា ១១ ៣២៦នាក់ បានទៅលេងប្រទេសឥណ្ឌា នៅឆ្នាំ២០២៤៕